Presentámosvos as defensoras acollidas por Galicia Abriga 2025
Ana Donis é unha asesora xurídica guatemalteca, feminista, que acompaña nenas, adolescentes e mulleres sobrevivintes de violencia sexual no seu camiño a recoñecerse como vítimas e suxeitas de dereito, co obxectivo último de que poidan retomar o seu proxecto de vida.
Faino da man de Mujeres Transformando el Mundo, unha organización pioneira na aplicación do litixio estratéxico con enfoque de xénero e na promoción de iniciativas de lei e políticas públicas que contribúan a erradicar a violencia en contra das mulleres en Guatemala.
Milagro Alvarado é unha muller feminista defensora de dereitos humanos en El Salvador. Licenciada en Traballo Social e cunha mestría en Desenvolvemento Local Sustentable, leva décadas traballando en defensa dos dereitos das mulleres, da infancia e da xuventude e de bens comúns como o territorio ou a auga.
Forma parte de La Colectiva Feminista para el Desarrollo Local desde a súa fundación e, xunto coas súas compañeiras, sufriu as consecuencias de situarse “en defensa da vida das mulleres”, fronte a un sistema patriarcal que non só está na cultura comunitaria, senón tamén na institucional. Sufriu un desprazamento forzado, dentro do seu propio país, e subliña a necesidade de destacar o labor das defensoras de dereitos.
Juventina López é unha muller indíxena guatemalteca. Agricultora, nai e guía espiritual maya Mam. É unha líder que loita pola recuperación da terra e a mellora das condicións de vida das comunidades rurais da costa sur de Guatemala a través de Asiaprodi, a organización que coordina.
Asiaprodi traballa con Arquitectura sen Fronteiras para mellorar a educación, a saúde, o acceso á auga e á vivenda das comunidades indíxenas do sur de Guatemala. “Aínda que aínda hai xente que vive o que eu vivín”, recoñece Juventina, “grazas á organización da sociedade civil e ao apoio da cooperación galega, as comunidades rurais guatemaltecas viven mellor hoxe en día”.
E recordámosvos as defensoras acollidas por Galicia Abriga 2024
Carolina Amaya é unha xornalista, ecofeminista e defensora de dereitos humanos salvadoreña acollida pola sociedade galega dentro do proxecto Galicia Abriga. Na actualidade, está a ser perseguida xudicialmente pola publicación dunha reportaxe en MalaYerba sobre a emerxencia ambiental provocada pola construción de vivendas de luxo no lago Coatepeque. A Asociación de Periodistas de El Salvador (APES) advertiu que esta persecución xudicial “busca censurar e/ou restrinxir o exercicio xornalístico” e explica que as agresións á prensa aumentaron en El Salvador un 66% en 2023 e que o tipo de agresión máis recorrente é a estigmatización do traballo xornalístico. Neste sentido, observan que aumentar a atención da comunidade internacional sobre esta situación pode ser un importante apoio na súa loita pola liberdade de expresión no país centroamericano.
Juana Ferrer Negrita é unha activista feminista e ecoloxista dominicana que loita cada día, desde hai máis de 30 anos, polo recoñecemento dos dereitos das mulleres rurais, en particular das que practican a agricultura. Forma parte da Vía Campesiña e ese esforzo de unir loitas en América Latina e construír a partir da colectividade é algo do que sente orgullosa. Grazas ao traballo da Confederación Nacional de Mujeres del Campo (Conamuca), que cofundou e dirixe, en República Dominicana as mulleres teñen dereito á propiedade da terra e acceden a unha maior formación en agroecología, comercialización e participación social e política